Abanyapolitiki, Sosiyete sivile n’abanyamategeko baramagana ibyo ubutegetsi bwa Perezida Tshisekedi buteganya byo guhindura Itegeko Nshinga rya Repubulika ya Demukarasi ya Congo.
Abahagarariye izo nzego baherutse kubwira itangazamakuru ko guhindura Itegeko Nshinga bitazabura kugira ingaruka ku gihugu muri rusange kuko bishobora kuzazamura imyiryane mu baturage.
Basohoye itangazo bahuriyeho ryamagana icyifuzo cy’ishyaka riri ku butegetsi cyo guhindura Itegeko Nshinga kugira ngo rihe Perezida Tshisekedi uburenganzira bwo kwiyamamariza manda ya gatatu.
Abategura ibyo guhindura ririya tegeko bavuga ko kurihindura rizatuma Tshisekedi akomeza guhangana n’imitwe imurwanyiriza mu Burasirazuba bw’igihugu cye harimo na M23.
Iyo ngingo bamwe bavuga ko itazabuza ko ibintu bikomeza gucika kuko bizatuma hirya no hino mu gihugu haduka imidugararo y’ababyamagana.
Bavuga ko iyo midugararo izarushaho gutuma umutekano udogera, ukagera no mu bice byari bisanzwe bitekanye.
Mu kiganiro n’itangazamakuru abavuga ibi baherutse gukora, batangaje ko hari ubukangurambaga bugenewe urubyiruko bwo kwamagana guhindura Itegeko Nshinga bwatangijwe.
Urubyiruko-muri ubwo bukangurambaga-rubwirwa ko ari rwo rukwiye gufata mu biganza ejo hazaza h’igihugu, rukanga ko Tshisekedi ahindura Itegeko rigenga andi yose kigenderaho.
Kuri bo, kuvuga ko guha Tshisekedi indi manda ari byo bizatuma atsinda inyeshyamba bidahuje n’ukuri.
Basanga kurihindura nta kindi byafasha kitari uguha Tshisekedi amahirwe yo kuguma ku butegetsi.
Biyemeje gutangiza hirya no hino mu gihugu ibikorwa byo kwamagana icyo gitekerezo haba imbere muri Repubulika ya Demukarasi ya Congo ndetse no mu baturage bayo baba imahanga.
Kiliziya Gatulika yo muri iki gihugu iherutse kwamagana ibyo guhindura itegeko nshinga ryacyo, ikavuga ko kubikora byaba ari ikosa rya politiki rikomeye.
