Ubuyobozi bwa Repubulika ya Demukarasi ya Congo bwagejeje ku bunyamabanga bukuru bw’Umuryango w’Afurika y’i Burasirazuba inyandiko ziyemerera kuba igihugu cya karindwi kigize uyu muryango.
Izi mpapuro zatanzwe kuri uyu wa Mbere taliki 11, Nyakanga, 2022 zakirwa n’Umunyamabanga mukuru wa EAC witwa Dr Peter Mutuku Mathuki.
Muri Werurwe, 2022 nibwo Repubulika ya Demukarasi ya Congo yakiriwe mu Muryango w’Afurika y’i Burasirazuba.
Hari mu muhango wabereye i Nairobi muri Kenya aho abayobozi b’ibindi bihugu bitandatu bari bateraniye.
Kwakirwa kwa kiriya gihugu byatumye hari abavuga ko bizazamura isoko ku basanzwe batuye EAC kuko DRC ari igihugu gifite isoko rigari.
Perezida w’u Rwanda Paul Kagame nawe yitabiriye uriya muhango wariririwemo DRC , ashima bagenzi be ko bemeye kwakira Repubulika ya Demukarasi ya Congo muri uyu muryango.
Kagame yabashimiye ko bashishoje becyemerera DRC kuwuzamo.
Repubulika ya Demukarasi ya Congo isanzwe ituwe n’abaturage barenga miliyoni 90, kuyinjiza muri EAC byatumye abatuye uyu Muryango biyongera baba miliyoni 260 ni ukuvuga ko baruta abatuye igihugu cya mbere gituwe cyane muri Afurika ari cyo Nigeria.
Yo ituwe n’abaturage bagera kuri miliyoni 210.
UPDATE: DR Congo July 11 officially became the 7th full member of the East African Community (EAC) after depositing instruments of ratification on the accession of the treaty for the establishment of EAC to the bloc's Secretariat. #NTVNews via @DailyMonitor
📸Courtesy pic.twitter.com/PCMOosfcbL— NTV UGANDA (@ntvuganda) July 11, 2022
Repubulika ya Demukarasi ya Congo ni igihugu kigari k’uburyo kiruta ibindi bihugu byose by’Umuryango w’Afurika y’i Burasirazuba ubibumbiye hamwe.
Gifite ubuso bwa kilometero kare miliyoni 2.4 mu gihe EAC yari isanzwe ifite ubuso bwa kilometero kare miliyoni 1.8 mbere y’uko Repubulika ya Demukarasi ya Congo iba umunyamuryango.
Akandi karusho k’icyi gihugu ni uko gifite icyambu cya Matadi gikora ku Nyanja ya Atlantique.
Ibihugu bya EAC byo bisanzwe bikoresha ibyambu bibiri bya Mombasa na Dar es Salaam n’ibindi bito bikora ku Nyanja y’u Buhinde.
Umusaruro mbumbe w’ibihugu by’Umuryango wa EAC ungana na Miliyali 193.7 $ n’aho uwa DRC ungana na Miliyali 50 $.
Kuyakira muri EAC bizatuma igira ubukungu bungana na Miliyali 243.7$.
N’ubwo Abakuru b’ibihugu bigize EAC bemereye Repubulika ya Demukarasi ya Congo kuba Umunyamuryano wayo, iki gihugu kibamo imitwe y’iterabwoba harimo ADF na FDLR
Ni igihugu kandi gikunze guhura n’ibibazo bya Politiki bigira ingaruka ku bindi byose bituranye nacyo.
