Minisiteri Ishinzwe Ibikorwa by’ubutabazi yatangaje ko ibikorwa byo gukingira icyorezo cya COVID-19 byakomereje mu nkambi z’impunzi, haherewe ku zakiriwe ziturutse muri Libya.
Ni gahunda ikomeje yo gukingira abantu bari mu byiciro biri mu byago byinshi byo kwandura cyangwa kuzahazwa n’icyorezo cya COVID-19 gikomeje kwibasira isi.
Minisiteri ishinzwe ibikorwa by’ubutabazi yatangaje iti “Uyu munsi gukingira COVID-19 mu nkambi z’impunzi byatangiriye ku bakuwe muri Libya bacumbikiwe mu nkambi y’agateganyo ya Gashora bategereje kujya gutura mu bindi bihugu byabahaye ubuhunzi ndetse n’abakozi bakora muri iyi nkambi.”
“Gukingira COVID-19 bizakomereza mu zindi nkambi z’impunzi hagendewe ku byiciro byugarijwe kurusha ibindi n’abari muri gahunda yo kwimurirwa mu bindi bihugu. U Rwanda rwiyemeje gukomeza gufasha impunzi binyuze muri gahunda zihari z’iterambere.”
Minisiteri y’Ubuzima yatangaje ko kugeza kuri uyu wa Kabiri hamaze gukingirwa abantu 220.000 bahawe urukingo rwa mbere, bagomba guhabwa ebyiri nk’uko amabwiriza agenga inkingo za Pfizer/BioNTech na AstraZeneca/Oxford abiteganya.
Mu bakingiwe harimo abantu barenga 11.000 barimo abamotari, abatwara imodoka z’abagenzi, imfungwa n’abagororwa n’abagize Urwego DASSO.
Kuri uyu wa Gatatu igikorwa cyakomereje mu mpunzi n’abasheshe akanguhe, aho abaganga babasanga ku bigo nderabuzima bibegereye.
Mu bakingiwe ku ikubitiro harimo impunzi n’abasaba ubuhungiro 197 bavanywe muri Libya hamwe n’abakozi 154 bo mu nkambi ya Gashora.
Kugeza mu mpera z’umwaka wa 2020 byabarwaga ko u Rwanda rucumbikiye impunzi 164.000 ziganjemo izaturutse muri Repubulika ya Demokarasi ya Congo n’u Burundi zicumbikiwe mu nkambi esheshatu za Gihembe, Kigeme, Kiziba, Mahama, Mugombwa na Nyabiheke, n’iziri mu mijyi ya Kigali na Huye.
