Ihuriro Mpuzamahanga ry’Inkingo (GAVI) kuri uyu wa Mbere ryatangaje ko ryagiranye amasezerano n’ibigo bibiri byo mu Bushinwa bikora inkingo za COVID-19, yo kugura inkingo miliyoni 110 ariko zishobora kuzagera kuri miliyoni 550 mu gice cya mbere cy’umwaka utaha.
Ni icyemezo gifashwe mu gihe inkingo za COVID-19 zikomeje kuba nke ku isoko, nyamara ibihugu bihanganye n’ubwiyongere bukabije bwa virus ya Delta ikomeje kuzahaza benshi.
Ibigo byo mu Bushinwa bigiye gutanga inkingo ni Sinopharm ikora urukingo yise “BBIBP-CorV” na Sinovac ikora “CoronaVac”. Zizahabwa ibihugu muri gahunda mpuzamahanga ifasha mu kubona inkingo, COVAX Facility.
Gavi yatangaje ko kuri Sinopharm, amasezerano yasinywe ateganya ko hazagurwa inkingo miliyoni 60 zizaboneka hagati ya Nyakanga n’Ukwakira 2021.
Biteganywa ko bibaye ngombwa hashobora kwiyongeraho izindi nkingo miliyoni 60 mu gihembwe cya kane cy’uyu mwaka wa 2021 n’izindi miliyoni 50 mu mezi atandatu ya mbere ya 2022.
Gavi yakomeje iti “Ibyo bivuze ko hashobora kugurwa inkingo miliyoni 170 za Sinopharm.”
Ku nkingo za Sinovac, amasezerano ateganya ko mu gihembwe cya gatatu cy’uyu mwaka Gavi yemeye kugura inkingo inkingo miliyoni 50 zigenewe COVAX, zizaboneka hagati ya Nyakanga na Nzeri 2021.
Biteganywa ko hashobora kwiyongeraho izindi nkingo miliyoni 150 mu gihembwecya kane cy’uyu mwaka na miliyoni 180 mu mezi atandatu ya mbere y’umwaka wa 2022.
Kuri uru rukingo biteganywa ko Gavi ishobora kuzagura inkingo miliyoni 380 za Sinovac.
Umuyobozi Mukuru wa Gavi, Dr Seth Berkley, yashimye amasezerano bagiranye na Sinopharm na Sinovac, azatuma haboneka inkingo nyinshi zizakwirakwizwa binyuze muri COVAX.
Yavuze ko ziriya nkingo “zigiye guhita zitangira kugezwa mu bihugu.”
Binyuze muri COVAX harimo gukwirakwizwa inkingo z’amoko 11 arimo AstraZeneca/Oxford, Clover, Johnson & Johnson, Moderna, Novavax, Pfizer-BioNTech, Sanofi/GSK, SII-Covishield, SII-Covovax, Sinopharm na Sinovac.
Izi nkingo zo mu Bushinwa zikora neza nubwo ari ku gipimo cyo hasi ugereranyije n’iza Pfizer cyangwa Moderna. Icyiza cyazo ni uko zibikwa muri firigo zisanzwe, mu bukonje buri hagati ya dogere Celcius 2-8.
Mu igerageza ryakorewe muri Brazil byagaragaye ko Sinovac irinda abayihawe kugaragaza ibimenyetso bya COVID-19 ku gipimo cya 51%, ariko ikarinda umuntu kuremba 100%. Ni mu gihe urukingo rwa Sinopharm ruri kuri 79% haba mu kurinda umuntu kugaragaza ibimenyetso cyangwa kuremba.
COVAX yiyemeje gutanga inkingo zisaga miliyari 2 mbere y’uko umwaka wa 2022 urangira.
