Menu
Indimi
Advert

Icyorezo COVID-19

Inkingo Za COVID-19 Zisaga Miliyoni Imwe Zoherejwe Mu Turere 12

Yanditswe kuwa

Gahunda yo gukingira COVID-19 mu Rwanda yafashe indi ntera, aho kuri uyu wa Mbere Ikigo cy’igihugu gishinzwe ubuzima (RBC) cyatangaje ko inkingo zisaga miliyoni 1 zoherejwe mu turere 12, zikazahabwa abaturage mu gihe cy’iminsi icumi.

Iyi gahunda irimo gukorwa nyuma y’uko mu minsi mike ishize u Rwanda rwakiriye inkingo nyinshi za COVID-19, zatanzwe n’ibihugu bitandukanye.

Imbaraga zo gukingira abantu benshi zahise zishyirwa mu turere tumaze gukingira abantu bakeya ugereranyije n’ahandi. Umujyi wa Kigali uza imbere mu kugira abaturage benshi bakingiwe, barenga 90%.

Mu butumwa yanyujije kuri Twitter, RBC yagize iti “Twatangije icyiciro cyo gukingira #COVID19 mu buryo bwagutse mu turere 12 hanze y’Umujyi wa Kigali. Doze zirenga miliyoni nizo zizakoreshwa mu minsi igera ku 10.”

Ku wa Gatandatu tariki 8 Ukwakira, u Rwanda rwakiriye inkingo 280,000 za AstraZeneca zatanzwe na Slovakia, mu gihe mbere yaho rwakiriye inkingo 195,500 za AstraZeneca zatanzwe n’u Bubiligi n’izindi 857,000 zatanzwe n’u Butaliyani.

Ni mu gihe ku wa 1 Ukwakira bwo rwakiriye inkingo 153,000 za COVID-19 zatanzwe n’u Bwongereza, nyuma y’iminsi mike hatangajwe ko Leta Zunze Ubumwe za Amerika igiye guha u Rwanda izindi nkingo 751,140 za COVID-19 zo mu bwoko bwa Pfizer, zatanzwe nk’impano.

Minisiteri y’Ubuzima iheruka gutangaza ko ikeneye gutanga akazi k’igihe gito ku baforomo n’abaforomokazi bo gutanga urukingo rwa COVID-19 mu turere 12 twa Nyamasheke, Rusizi, Karongi, Rubavu, Rutsiro, Musanze, Gicumbi, Burera, Nyagatare, Kirehe, Kayonza na Gatsibo.

Ni igikorwa yemeje ko kigamije “kwegereza inkingo abaturage”, kikazabera mu bigo nderabuzima.

Buri kigo nderabuzima kibarizwa muri utwo turere cyagenewe abakozi babiri, abakandida bakaba bagomba gutanga ubusabe bitarenze kuri uyu wa 12 Ukwakira.

Muri iyi minsi harimo gukingirwa abantu benshi, aho nko ku wa Gatandatu abahawe urukingo rwa mbere bari 53,369, mu gihe abaruhawe ejo ku Cyumweru bari 100,371.

Muri rusange abamaze gukingirwa byuzuye mu Rwanda ni miliyoni 1.6 mu gihe abahawe urukingo rumwe muri ebyiri ziteganywa ari miliyoni 2.1.

Intego ni uko mbere y’uko uyu mwaka urangira hazakingirwa abaturarwanda 30%, mu mwaka utaha abakingiwe bakagera kuri 60%, ni ukuvuga miliyoni 7.8.

Imibare yo mu kwezi gushize igaragaza uko gukingira byari byifashe

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement
Advertisement
Advertisement Enter ad code here