Polisi ikorera mu mujyi wa Kigali ifatanije n’inzego zitandukanye zirimo Urwego rw’Ubugenzacyaha, Urwego rw’ubushinjacyaha, Inzego z’ibanze ndetse n’abaturage, yangirije mu ruhame ibiyobyabwenge n’ibicuruzwa bitemewe byafatanywe abaturage babicuruza mu bihe bitandukanye mu mujyi wa Kigali, iki gikorwa cyabereye mu Murenge wa Nduba ahasanzwe hajyanwa imyanda ikusanywa mu mujyi wa Kigali.
Ibyangijwe bifite agaciro ka Frw 61.701.740, birimo urumogi rw’ibiro 352, kanyanga litiro 1203, inzoga z’inkorano zitujuje ubuziranenge z’amoko atandukanye, ibiribwa, ibinyobwa bitandukanye, amavuta atukuza azwi nka mukorogo n’ibindi.
Umuvugizi wa Polisi mu mujyi wa Kigali CIP Wellars Gahonzire yatangaje ko ibiyobwange n’ibindi bicuruzwa bitemewe byangijwe byari bibitse mu masitasiyo ya Polisi atandukanye yo mu mujyi wa Kigali.
CIP Gahonzire yatangaje ko ibi biyobyabwenge n’ibicuruzwa bitemewe byafatanywe abaturage mu Mirenge itandukanye igize umujyi wa Kigali ndetse no mu bihe bitandukanye biturutse ku makuru yatanzwe n’abaturage, ababifatiwemo bakorewe amadosiye bashyikirizwa ubutabera.
Polisi y’igihugu irashimira abaturage batanze amakuru yatumye ibiyobyabwenge ndetse n’ibindi bicuruzwa bitemewe bifatwa bitarakwirakwira mu baturage ngo bibagireho ingaruka.
Irihanangiriza abaturage bishora mu bikorwa byo gucuruza ibiyobyabwenge ndetse n’ibindi bicuruzwa bitemewe kubireka bagashaka ibindi bakora byabagirira akamaro.
Yibutsa kandi ko ari icyaha gihanwa n’amategeko y’u Rwanda harimo n’igifungo cy’igihe kirekire.
