Umukinnyi uri mu bakomeye babayeho mu mateka ya Basketball Bwana LeBron James yaguze imigabane mu kigo gifite ikipe yo mu Bwongereza yitwa Liverpool FC kitwa Fenway Sports Group (FSG).
Ikigo FSG nicyo gicunga indi kipe yitwa Boston Red Sox ikina umukino wa Baseball.
James yaguze umugabane ungana na 2% muri FSG, bityo we na mugenzi we basangiye ‘business’ witwa Maverick Carter baba bamwe mu bashoramari bakomeye mu mikino yo ku isi.
Maverick Carter na LeBron James nibo Birabura ba mbere ku isi bafite imigabane mu makipe akomeye ku isi haba muri Football no muri Baseball.
Forbes Magazine yanditse ko bombi bashoye angana na miliyari $4 mu mikino ku isi.
Itsinda rya business ryitwa FSG rifite undi mugambi wo gushora imari wa miliyoni $750 mu kigo kitwa RedBird Capital Partners.
Amakuru avuga kiriya kigo gifite umugambi wo gukomeza inzego za Liverpool na Boston Red Sox.
Umugabane wa LeBron James ungana na miliyoni £ 37.
James asanzwe ari icyamamare ku isi mu ikipe ya Basketball iri mu za mbere zikomeye muri USA yitwa Los Angeles Lakers.
Aherutse gutangaza ko mu migambi ye harimo no kuzagura imwe mu makipe ya Basket akomeye muri Shampiyona ya USA yitwa NBA( National Basket Association).
Forbes yanditse ko uyu mukinnyi atunze miliyoni $450 kandi ko muri 2020 yinjije izindi miliyoni $88.
Ku rutonde rw’abakinnyi binjije menshi muri 2020 ari ku mwanya wa gatanu.
Afite kandi ubucuruzi akorana n’icyamamare muri sinema ku isi kitwa Arnold Schwarzenegger.
James afite amaduka 19 acururizamo pizza muri za Leta za Chicago na Florida y’Epfo.
Umurwa mukuru wa Chicago witwa Illinois, ikaba ituwe n’abaturage barenga gato miliyoni 2.
Hagati aho Liverpool ari gushoramo imari iri ku mwanya wa gatandatu muri Shampiyona y’Abongereza yitwa Premier League.
