Polisi Mpuzamahanga ikorera i Lyon mu Bufaransa yaburiye Isi cyane cyane ibihugu bikennye ko abagizi ba nabi bafite umugambi wo gukora no kugurisha inkingo za COVID-19 zitujuje ubuziranenge.
INTELPOL isaba amahanga kuba maso.
Afurika y’Epfo yabaye iya mbere mu kumva uyu muburo bituma ifata inkingo 2,400 zitujuje ubuziranenge zari zibitswe ahitwa Gauteng.
Polisi kandi yahasanze udupfukamunwa miliyoni eshatu tutujuje ubuziranenge.
Hafashwe Abashinwa batatu n’Umunya Zambia umwe bakurikiranyweho uruhare mu kwinjiza biriya bintu muri kiriya gihugu.
Umuburo wa Polisi Mpuzamahanga uherutse gufasha Polisi y’u Bushinwa gufata abantu 80 ibakurikiranyeho kugira uruhare mu gukora inkingo 3,000 zitujuje ubuziranenge.
Polisi Mpuzamahanga yatangaje umuburo yise ‘Orange Notice.’
Uwo muburo usobanura mu buryo bwimbitse amakuru ahari y’uko hari amatsinda y’abagizi ba nabi bashaka gukura inyungu mu nkingo za COVID-19.
Abo bagizi ba nabi bateganya kuzakoresha uburyo bwose burimo gukora inkingo zitujuje ubuziranenge, kuzamamaza bakoresheje murandasi no gukoresha ikoranabuhanga kugira ngo zigere mu biganza by’abo zitagenewe.
Umunyamabanga mukuru w’uriya muryango witwa Jürgen Stock avuga ko amakuru amaze kumenyekana ku migambi y’abagizi ba nabi bashaka gushakira amaramuko mu nkingo za COVID-19 ari ‘agatonyanga mu Nyanja.’
