Ramos Na Bagenzi Be Basuye Pariki Y’Akagera

Amakuru Taarifa ifite ivuga ko ibyamamare byo muri Paris Saint Germain birimo na myugariro uri mu bakomeye kurusha abandi ku isi, byasuye Pariki y’Akagera.

Umwe mu baherekeje bariya bakinnyi yabwiye Taarifa ko bariya bakinnyi bishimiye iriya Pariki.

Hagati aho hari amakuru avuga ko kuri uyu wa Mbere taliki 02, Gicurasi, 2022, biriya byamamare bizagirana ikiganiro n’abanyamakuru.

Kuri uyu wa Gatandatu taliki 30, Mata, 2022 nibwo aba bakinnyi bageze mu Rwanda.

Abo bakinnyi bakomeye ni  Sergio Ramos, Keylor Navas na Julian Draxler.

Hari hashize igihe gito bitangajwe n’ubuyobozi bw’Ikigo cy’igihugu cy’iterambere , RDB , ko bariya bakinnyi bazasura u Rwanda kuri uyu wa Gatandatu.

Umuyobozi w’iki kigo Clare Akamanzi aherutse kuvuga ko bariya bakinnyi bazaza mu Rwanda mu rwego rwo kubahiriza amasezerano u Rwanda rwagiranye n’iriya kipe yo kwamamaza u Rwanda binyuze mu kiswe Visiti Rwanda.

Ati: “ Bazasura ahantu hatandukanye mu Rwanda no muri Pariki zose uko tuzizi.”

Clare Akamanzi avuga ko kubera ko bariya bakinnyi bazwi n’abantu benshi, bivuze ko aho bazasura hose abakunzi babo bazaba bahakurikiranira hafi bityo nabo bamenye u Rwanda.

Avuga ko icyo u Rwanda rushaka ari uko abanyamahanga barumenya ari benshi bakarusura bikarwinjiriza ariko nabo barugeramo bakumva baguwe neza.

Sergio Ramos Na Bagenzi Be Bageze I Kigali

Mu mwaka wa 2021 ubwo Perezida Kagame yagiranaga ikiganiro n’abaturage, yakomoje k’urukundo akunda Arsenal ndetse na Paris Saint Germain.

Icyo gihe yavuze ko kuba u Rwanda rukorana na Paris Saint-Germain bishingiye no kuba ifite n’abakinnyi beza.

Yigeze kubwira Clèophas Barore wari  wamukoresheje ikiganiro muri Nzeri, 2021 ko Paris Saint- Germain ari ikipe nziza  ndetse mu bakinnyi beza ifite harimo na Messi, Neymar, Mbappé n’abandi.

Ubu u Rwanda rukorana n’amakipe abiri akomeye ari yo Arsenal yo mu Bwongereza na Paris Saint-Germain yo mu Bufaransa.