Niyomukiza Eric na Niyomugabo Claude bigaga mu Mashuri abanza yo ku Murenge wa Kinihira barohamye mu Mugezi wa Nyabarongo barapfa. bahasiga ubuzima.
Eric yari afite imyaka 11 y’amavuko n’aho Niyomugabo akagira imyaka icyenda y’amavuko.
Bose iwabo hari mu Mudugudu wa Nyabivumu, Akagari ka Bweramvura Umurenge wa Kinihira mu Karere ka Ruhango.
UMUSEKE wanditse ko amakuru ukesha abaturage b’aho abo bana babaga avuga ko bari bagiye kwahira ubwatsi bw’amatungo nyuma bashaka koga muri Nyabarongo irabatwara.
Umunyamabanga Nshingwabikorwa w’Umurenge wa Kinihira Uwamwiza Jeanne D’Arc avuga ko urupfu rw’abo bana rwabaye ku mugoroba wo kuri uyu wa gatatu, saa kumi n’igice.
Avuga ko barangije amasomo bajya kwahirira ubwatsi amatungo y’ababyeyi babo bageze ku mugezi bashaka kwidumbaguza.
Ubwo bashokaga amazi yahise abatwara kubera ko batari bazi tekiniki zo koga mu mazi atemba.
Gitif Uwamwiza ati: “Ababarohoye basanze barangije kwitaba Imana, ubu imirambo yabo yajyanywe mu Bitaro.”
Yihanganishije ababyeyi b’aba bana.
Imirambo y’abo bana iri mu buruhukiro mu bitaro bya Gitwe kugira ngo ikorerwe isuzuma.
