Menu
Indimi
Advert

Mu mahanga

Senegal ‘Izatangira’ Gukora Inkingo Za COVID-19 Umwaka Utaha

Yanditswe kuwa

Senegal ishobora gutangira gukora inkingo za COVID-19 guhera mu mwaka utaha, binyuze mu masezerano n’ikigo Univercells cyo mu Bubiligi. Ni uburyo bwitezweho kongera inkingo zigenewe Abanyafurika.

Kugeza ubu bibarwa ko mu baturage hafi miliyari 1.3 batuye Afurika, abamaze gukingirwa byuzuye batarenga miliyoni 7.

Nyamara inkingo za COVID-19 ni bwo buryo bwonyine butanga icyizere cyo gutuma ubuzima busubira uko bwahoze, mu gihe ku isoko mpuzamahanga zitarimo kuboneka uko bikwiye.

Reuters yatangaje ko yahawe amakuru ko Univercells na Institut Pasteur basinyiye amasezerano y’imikoranire i Dakar muri Senegal, muri Mata. Ntabwo ibikubiye muri ayo masezeraho iki kinyamakuru cyabonye byari byatangazwa ku mugaragaro.

Institut Pasteur isanzwe ikorera muri Senegal inkingo za ‘yellow fever’, zemewe n’Ishami ry’Umuryango w’Abibumbye ryita ku buzima.

Biteganywa ko binyuze muri ariya masezerano, Institut Pasteur izifashisha ikoranabuhanga ryifashishwa mu gukora inkingo ryakozwe Univercells, mu gukwirakwiza inkingo za COVID-19 muri Afurika y’Iburangerazuba.

Ku ikubitiro Institut Pasteur izaba ipfunyika ndetse igakwirakwiza inkingo zizaba zakozwe na Univercells mu Bubiligi, guhera mu mwaka utaha.

Biteganywa ko Univercells izimurira muri Senegal ubushobozi bwuzuye bwo gukora inkingo mu gice cya kabiri cy’umwaka wa 2022, ndetse abanya-Senegal bakazahabwa amahugurwa yo gukora iyo mirimo.

Umuyobozi ushinzwe ishoramari muri Univercells, Kate Antrobus, yemeje ko bazatangira kohereza inkingo muri Senegal mu ntangiriro z’umwaka utaha.

Ntabwo yashatse kugira icyo atangaza ku gihe inkingo zizaba zikorerwa muri Senegal, ariko ngo bizaterwa n’igihe hazatangirwa uburenganzira bwo kuzikorera mu Bubiligi, kandi ni vuba.

Umuyobozi wa Institut Pasteur, Amadou Sall, we yanze kugira icyo atangaza ku gihe umushinga uzatangirira cyangwa ingano yawo, ariko yemeza ko barimo gukorana n’abafatanyabikorwa ngo haboneke ishoramari rikenewe.

Ati “Hari ubushake bwinshi bwa politiki, mfite icyizere.”

Ntabwo haramenyekana inkingo zizaba zoherezwa muri Senegal, ariko Antrobus yavuze ko bazaba bafite ubushobozi bwo gukora izo mu rwego rwa Johnson & Johnson , AstraZeneca, Sputnik V yo mu Burusiya na CanSino rwo mu Bushinwa.

Yakomeje ati “COVID niramuka igabanyutse mu mwaka utaha, ubwo bushobozi bushobora kwifashishwa ku zindi virus.”

Univercells nayo ifite urukingo rwayo rwa COVID-19 rwakozwe ku bufatanye n’ikigo Leukocare cyo mu Budage na ReiThera cyo mu Butaliyani, ruheruka gusoza igerageza ku cyiciro cya kabiri, ni ukuvuga ku itsinda rito ry’abantu.

Harimo gushakishwa ubushobozi bukenewe ngo hakorwe igerageza ku rwego rwa gatatu, ni ukuvuga ku bantu benshi.

Hari amakuru ko abaterankunga bakomeye barimo Leta Zunze Ubumwe za Amerika n’Umuryango w’Ubumwe bw’u Burayi biteguye gutanga inkunga ikenewe, kugira ngo ubushobozi bukenewe ngo hakorwe inkingo za COVID-19 buboneke.

Ni umushinga ngo ushobora gukenera miliyoni $200, harebwe ku ngano y’inkingo zisaga miliyoni 300 za COVID-19 zigomba kuhaturuka bitarenze umwaka utaha.

Umuryango w’Ubumwe bw’u Burayi mu kwezi gushize watangaje ko ugiye gushora miliyari 1 y’amayero mu mishinga yo kubaka ibigo bikorerwamo inkingo za COVID-19 muri Afurika. Harimo gusuzumwa imishinga itanga icyizere y’ibihugu bya Afurika y’Epfo, Senegal, Misiri, Morocco n’u Rwanda.

Ikigo Biovac Institute cyo muri Afurika y’Epfo giheruka gutangaza ko kiri mu biganiro na Guverinoma z’u Bufaransa n’u Budage kimwe n’ibindi bigo bikora imiti, hagamijwe gukora inkingo miliyoni 30 za COVID-19 ku mwaka.

Ni mu gihe ikigo Aspen Pharmacare cyo muri Afurika y’Epfo cyo ubu kirimo gukora inkingo za Johnson & Johnson.

Ni ishoramari ryose hamwe rishobora kuzana impinduka mu buryo Afurika ihanganyemo na COVID-19, aho bibarwa ko uyu munsi Afurika itumiza mu mahanga 99% by’inkingo zose ikenera na 94% by’imiti ikoresha.

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement
Advertisement