Abantu umunani bo mu gace ka Buloburde muri Somalia bapfiriye rimwe nyuma yo guturikanwa na bombe bivugwa ko yatezwe n’abarwanyi ba Al Shabaab.
Umuyobozi w’Umujyi byabereyemo witwa Sadam Abdi Idow yabwiye NTV ko umwe muri bariya bantu yari umugore.
Igisasu cyabaturikanye ku Cyumweru mu masaha y’ijoro, bamwe bahita bahagwa abandi bajyanwa kwa muganga baza kugwa yo.
Ni igitero cyabereye mu ntera y’ibilometero 220 uturutse mu Murwa mukuru wa Somalia, Mogadishu.
Sadam Abdi Idow avuga ko abarwanyi ba Al Shabaab bari bamaze iminsi bakubiswe inshuro, barahunga ariko basiga bateze iriya bombe.
Abanenga ko bananiwe kurwanya abasirikare ahubwo bagahitamo gusagarira abasivili.
