Matege, utuye mu gace ka Kasambira Trading Centre, mu Karere ka Kamuli, yakoze indege ntoya imeze nka kajugujugu akoresheje ibikoresho by’ibyuma, ayita “Chopper Fighter Jet 136 Matege UG.”
Iyi ndege yakozwe mu buryo bwihariye, ikaba igaragaramo ibyuma biyigize, ibyuma bizenguruka kugira ngo biyifashe kuguruka (rotor blades), ahicara uyitwaye hasa n’aho umupilote w’indege yicara ndetse n’imipine imeze nk’iy’ipikipiki.
Matege yagerageje kureba niba igikoresho yakoze gishobora kuguruka, ariko iryo gerageza ntiryagenze neza kuko indege yaje gukora impanuka iragwa.
Amakuru yatangajwe n’ibitangazamakuru byo muri Uganda avuga ko iyi mpanuka yabaye mu gihe yari mu igerageza ryo kureba ubushobozi bw’iyo ndege.
Matege yaravunitse ukuboko.
Nubwo uyu mushinga wagize imbogamizi, Matege aracyafite intego yo kuwukomeza, agasaba abantu n’abamushyigikiye kumufasha kubona ubushobozi bwo gukomeza gukora ubushakashatsi no kunoza igihangano cye.
Amakuru amwe avuga ko yifuzaga ko iyi ndege yazajya ishobora kugendera mu muhanda ndetse ikanaguruka mu kirere, ariko ubushobozi bwayo nyakuri ntiburamenyekana kuko nta bizamini bya tekiniki byemeza ibyo ishobora gukora biratangazwa.
Muri Uganda, hari n’undi mugabo witwa Joseph Nkaheza wigeze kuvugwa mu 2018 ubwo indege yari yakoze mu buryo bwe bwite yagwaga ikangirika ubwo yageragezaga kuyigurutsa.
