Ishami rya Polisi rishinzwe kurwanya ibiyobyabwenge (ANU), rikorera mu mujyi wa Kigali ryafatiye umugabo witwa Murengezi w’imyaka 24 wo mu Karere ka Kicukiro mu Murenge wa Gahanga mu Kagari ka Karembure, mu Mudugudu wa Kamuyinga, afite udupfunyika 1000 tw’urumogi.
Akimara gufatwa yatangaje ko uru rumogi yararukuye mu Ntara y’Uburengerazuba mu Karere ka Nyabihu aruzaniye abakiliya batuye mu Mujyi wa Kigali.
Yakorewe dosiye ashyikirizwa urwego rw’ubugenzacyaha (RIB) ngo akurikiranweho icyaha cyo gucuruza ibiyobyabwenge.
Umuvugi wa Polisi mu Mujyi wa Kigali CIP Wellars Gahonzire yashimiye abaturage batanze amakuru uyu mucuruzi w’urumogi agafatwa.
Yarufatanywe rwose uko rwakabaye atararugurisha
Gahonzire yibutsa n’abandi gukomeza gutanga amakuru ku bantu bazwiho ubucuruzi bw’ibiyobyabwenge kugira ngo bafatwe kuko bagira uruhare mu kwangiza ubuzima bw’abaturage.
Abacuruza cyangwa abanywa ibiyobyabwenge bagirwa inama yo kubireka kuko uburyo bwose bakoresha buzwi.
Ingingo ya 263 mu gitabo cy’itegeko riteganya ibyaha n’ibihano muri rusange ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranyije n’amategeko, aba akoze icyaha.
Iyo abihabijwe n’urukiko ahanishwa igifungo cya burundu n’ihazabu itari munsi ya Miliyoni Frw 20 ariko atarenze Miliyoni Frw 30 ku byerekeye ibiyobyabwenge bihambaye.
