Banki ya Kigali yasinyanye na Rwanda Premier League amasezerano y’imyaka itanu n’igice yo gutera inkunga Shampiyona y’Icyiciro cya Mbere muri ruhago y’u Rwanda.
Aya masezerano afite agaciro ka miliyari Frw 3 na miliyoni 250 yatumye Shampiyona ihindura izina, aho guhera kuri uyu wa Gatanu yitwa BK Pro League.
Aya masezerano agaragaza intambwe ikomeye mu iterambere siporo nyarwanda mu mupira w’amaguru, kuko azafasha mu kongera ubushobozi bw’amakipe, guteza imbere abakinnyi ndetse no kunoza imiyoborere y’amarushanwa.
Biteganyijwe ko amafaranga azatangwa azifashishwa mu guteza imbere ibikorwa remezo bya siporo, kongera umushahara n’ibihembo ku bakinnyi, ndetse no kuzamura ireme ry’imikino kugira ngo irusheho gukurura abafana benshi n’abaterankunga.
Ubufatanye bwa Banki ya Kigali na Rwanda Premier League kandi buzagira uruhare mu guteza imbere ubucuruzi bushingiye kuri siporo, binyuze mu kwamamaza, guhanga imirimo ijyanye na ruhago, no kongera amahirwe ku rubyiruko rufite impano.
Ibi byose bizafasha Shampiyona y’u Rwanda kugera ku rwego mpuzamahanga no guhangana n’izindi shampiyona zo mu karere.
Byongeye kandi, guhindura izina rya shampiyona rikaba BK Pro League biteganyijwe ko bizongera kumenyekanisha iri rushanwa ku rwego mpuzamahanga, bikazamura agaciro karyo haba mu bukungu no mu rwego rwa siporo muri rusange.
