Mu Murenge wa Nasho mu Karere ka Kirehe haravugwa impanuka yahitanye abantu bane abandi 16, barakomereka. Yakozwe n’imodoka yavaga muri Nasho ijya i Kigali, iyo modoka ikaba yari coaster yarenze umuhanda.
Umuvugizi wa Polisi mu Burasirazuba, Senior Superintendent of Police( SSP) Twizeyimana Hamdun avuga ko abantu babiri bahise bahagwa, abandi babiri bagwa kwa muganga.
Ubwo byamenyekanaga, abantu 16 nibo bari bakomerekeye muri iyi mpanuka ikomeye, yabereye mu Kagari ka Kagese, mu ijoro rishyira ku wa 18 Kanama(8) 2026.
SSP Twizeyimana Hamdun yavuze ko batari bamenya icyayiteye ariko umushoferi yavuze ko yabuze feri kubera ko hari ahantu hamanuka cyane.
Polisi isaba abashoferi kwitwararika, bakirinda umuvuduko, ntibanywe ibisindisha kandi bakazirikana gukoresha igenzura ry’ibinyabiziga; ibyo bita contrȏle technique.
Umunaniro uri mu bikunze gutera abashoferi kurenza imodoka umuhanda bakagwa mu manga, bakagonga abanyamaguru, ibiti, inzu cyangwa ibindi bintu biri hafi aho.
Kugeza ubu abantu 16 bakomerekeye muri iyi mpanuka bari kuvurirwa mu bitaro bitandukanye.
