RSSB Tigers yo mu Rwanda yabuze amahirwe yo kugera ku mukino wa nyuma wa FIBA Intercontinental Cup 2026, nyuma yo gutsindwa na NBA G League United yo muri Amerika amanota 114-95, mu mukino wa ½ wabereye i Beijing mu Bushinwa.
NBA G League United yatangiye umukino neza, irangiza agace ka mbere iyoboye ku manota 31-30. Mu gace ka kabiri yakomeje kongera ikinyuranyo, igera mu gihe cyo kuruhuka ifite 56-53.
Mu gace ka gatatu nabwo NBA G League United yashimangiye ko ikomeye itsinda amanota 29 kuri 17 ya RSSB Tigers, mbere yo gusoza umukino itsinze 114-95.
Lester Quinones wa NBA G League United ni we watsinze amanota menshi ku giti cye, agira 26, mu gihe Teafale Lenard Jr. wa RSSB Tigers yatsinze 27.
RSSB Tigers yari yabonye itike yo gukina ½ nyuma yo gutsinda neza umukino wo ny matsinda, itsinda Shanghai Sharks 117-115 nyuma y’iminota y’inyongera, nyuma yo kuba yari yatsinzwe n’amanota 19.
Muri Group A, Tigers yarangije ku mwanya wa kabiri inyuma ya Rytas Vilnius yo muri Lithuania.
Kuba RSSB Tigers yarageze muri ½ cya FIBA Intercontinental Cup ni intambwe ikomeye ku mukino wa Basketball wo muri Afurika cyane cyane ko iyi kipe itari isanzwe igera ahantu nk’aho.
Muri 2025, Alahli SC yo muri Libya ni yo yabaye ikipe ya mbere yo muri Afurika igera mu myanya itatu ya mbere muri iri rushanwa, nyuma yo kwegukana umwanya wa gatatu.
RSSB Tigers ubu izakina umukino wo guhatanira umwanya wa gatatu ku Cyumweru tariki ya 27 Nzeri 2026, aho izahura n’izatsindwa hagati ya Rytas Vilnius na Club Atlético Boca Juniors.
Umukino wa nyuma na wo uteganyijwe kuri uwo munsi i Beijing.
FIBA Intercontinental Cup 2026 ihuza amakipe atandatu yabaye aya mbere mu marushanwa atandukanye ku migabane, harimo RSSB Tigers yabaye iya mbere muri Basketball Africa League (BAL) 2026, Rytas Vilnius yabaye iya mbere muri Basketball Champions League Europe, Boca Juniors yabaye iya mbere muri Basketball Champions League Americas ndetse na NBA G League United ihagarariye NBA G League.
Jean d’Amour TUYISHIME Claver
TAARIFA.RW
