Muri Croatia aho hari bagiye bahagarariye ikipe y’igihugu cyabo ya Handball, abakinnyi 10 muri 13 bagize iyo kipe y’Uburundi babuze. Ntawamenye aho barengeye.
Kubera iyo mpamvu, hahise hanzurwa ko iyi kipe ivanywe muri ririya rushanwa yari isigaje gukinamo imikino ibiri.
Iyi kipe yari imwe muzihagarariye Afurika muri iryo rushanwa riri kubera Zagreb mu Murwa mukuru wa Croatia.
Ryatangiye taliki 02 rikazarangira taliki 13, Kanama, 2023.
Mu itsinda ryabwo rya H Uburundi bwarangije buri ku mwanya wa nyuma kuko ku mikino ya nyuma bwatsinzwe na Iran, butsindwa n’ibirwa bya Féroé ndetse Suède.
Byahise bibushyira mu itsinda rya kane ry’ikindi cyiciro cy’Igikombe cy’Isi cyiswe ‘President’s Cup.’
No muri iki cyiciro bwarahakubitiwe kubera ko bwatsinzwe na Argentine ibitego 39-25.
Hari kuwa Mbere, tariki ya 7, Kanama, 2023.
Bukeye bw’aho bwongera gutsindwa na Leta Zunze Ubumwe za Amerika ibitego 33-26.
Byatumye butangira guhatanira kuva ku mwanya wa 29 kugeza ku wa 32 aho muri iki cyiciro kuri uyu wa Kane taliki 10, Kanama, 2023 bwari guhura na Bahrain n’aho kuri uyu wa Gatanu taliki 11, Kanama, 2023 bugakina na Nouvelle-Zélande.
Mu buryo bwari bwitezwe na benshi mu bakurikiranira hafi imigendekere y’amarushanwa y’uriya mukino, Impuzamashyirahamwe y’Umukino wa Handball ku Isi (IHF) yasohoye itangazo rivuga ko ‘u Burundi bwikuye mu mikino isigaye y’iki gikombe cy’Isi.’
Byahise byumvikana ko mu mukino wari kubuhuza na Bahrain butewe mpaga y’ibitego 10-0.
Ibyo byose kandi byaje byiyongera cyangwa bishingiye k’ukuba hari abakinnyi 10 b’iyi kipe baburiwe irengero nk’uko itangazamakuru ryo mu Burundi ribyemeza.
