Leta ya Israel yatangaje imyirondoro y’Abanya-Tanzania babiri byemezwa ko bashimuswe na Hamas.
Hamas yagabye ibitero muri Israel taliki 07, Ukwakira, 2023 ihitana abantu 700 icyarimwe ariko nyuma haza gupfa abandi bazize ibikomere.
Icyo gihe kandi hari abandi bantu bashimuswe n’abo barwanyi, ubu bikaba byamenyekanye ko harimo n’abanya Tanzania.
Kuri X, Minisiteri y’Ububanyi n’Amahanga ya Israel yavuze ko Joshua Loitu Mollel na Clemence Felix Mtenga ari bo banya Tanzania bashimuswe na Hamas, bakaba bari bari muri Israel muri gahunda y’imenyerezamwuga mu by’ubuhinzi.
Minisiteri yongeyeho iti: “Bashimuswe n’abaterabwoba ba Hamas ndetse bafungiye muri Gaza. Turabasabye mwifatanye natwe mu gusengera ko bagarurwa batekanye kandi aka kanya.”
Kuri ubwo butumwa hari ho n’ifoto yabo uko ari babiri.
Se wa Joshua yabwiye BBC ko Ambasaderi wa Israel muri Tanzania yamuhamagaye akamwizeza ko ubutegetsi bwa Israel burimo gukurikirana iki kibazo.
Umuryango wa Clemence nta cyo wari watangaza ku mwana wabo wabuze.
Ambasade ya Tanzania muri Israel nayo ntacyo iratangaza kuri ibyo byatangajwe na Minisiteri y’ububanyi n’amahanga ya Israel.
Imibare itangazwa na Ambasade ya Tanzania muri Israel ivuga ko hari Abanya-Tanzania barenga 350 baba muri Israel, muri bo abagera kuri 260 ni abanyeshuri.
Hagati aho hari Umunya Afurika y’Epfo nawe bivugwa ko yashimuswe n’uriya mutwe.
