Fridolin Ambongo Besengu usanzwe  ari Cardinal wa Kinshasa akaba na Perezida wa Perezida w’Ihuriro ry’Abepiskopi Muri Afurika na Madagascar (SECAM) arasura u Rwanda kuri uyu wa Mbere.

Araba aje mu nama Inama ya Komite Ihoraho y’Ihuriro ry’Inama z’Abepiskopi muri Afurika na Madagascar.

Izitabirwa n’abandi Bepiskopi 11 n’Abapadiri bafite imirimo inyuranye muri iyi Komite.

Abayitabira bazaturuka muri Nigeria, Mozambique, Algerie, Madagascar, Namibia, Ghana, Tchad, Kenya na Repubulika ya Demukarasi ya Congo.

- Kwmamaza -

Cardinal Fridolin Ambongo yigeze  kunenga uko ubutegetsi bwa Kinshasa bukemura ikibazo cy’intambara mu Burasirazuba bwa Repubulika ya Demukarasi ya Congo.

Yigeze kandi kunenga ko Leta y’iki gihugu ikorana na FDLR binyuze mu kuyitoza no kuyiha intwaro, yo hamwe na Wazalendo.

Amagambo ye yarakaje bamwe mu baturage n’abanyapolitiki bakomeye bo mu ishyaka riri ku butegetsi biba ngombwa ko yiyunga nabo binyuze mu biganiro yagiranye na Perezida Felix Antoine Tshisekedi.

Mu mwaka wa 2023 Perezida Félix Tshisekedi  yari yatangaje ko muri Kiliziya Gatolika ya DR Congo harimo ‘abayobya’ bashobora ‘gusenya ubumwe bw’igihugu […] cyane cyane muri uyu mwaka w’amatora’, aburira ko atazareka ibyo biba.

Hari mbere y’amatora yabaye mu mpera z’uriya mwaka, Tshisekedi akayatsinda.

Yabivuze nyuma y’inama y’Abasenyeri Gatolika bo muri DRC yari yanengewemo uko ubutegetsi bwa Tshisekedi bwari buyoboye igihugu mbere y’amatora.

Itangazo ry’aba basenyeri ryavugaga ko kuva Congo yabona ubwigenge mu 1960, igihugu “cyagumye mu bibazo bya politike bihora bigaruka, kandi imwe mu mpamvu ni ikibazo cyo gushidikanya ku nzego n’abazikuriye niba byemewe n’amategeko”.

BBC icyo gihe yanditse ko abo basenyeri bavuze ko kuva Tshisekedi agiye ku butegetsi mu mwaka wa  2019, “ibintu byasubiye inyuma bibabaje harimo guhohotera abigaragambya batavuga rumwe n’ubutegetsi, gutambamira ubwisanzure bw’abatavuga rumwe n’ubutegetsi, gushaka gushyiraho amategeko avangura, gukoresha ubucamanza no gufunga abantu binyuranyije n’amategeko”.

Basabye abaturage kutabeshywa, bagatora ababategeka mu bwisanzure, babasaba kandi kuba maso ntibakoreshwe nabi “nko mu matora ya 2018”.

Amatora yo mu mwaka wa 2018 yatsinzwe na Felix Tshisekedi ari ko abanza kuyobora afatanyije na Joseph Kabila mu rugero runaka.

Birashoboka ko mu ruzinduko Cardinal Ambongo ari bugirire mu Rwanda ari buganire na mugenzi we Cardinal Antoine Kambanda.