Ishami ry’Umuryango w’Abibumbye ryita ku bimukira (IOM) ryatangaje ko abantu 109, barimo abana 15, bapfiriye mu bwato bwarohamye mu Nyanja butwaye abimukira bagera kuri 305, buvuye muri Djibouti bwerekeza muri Yemen.
IOM yatangaje ku Cyumweru ko abandi bantu barenga 116 baburiwe irengero nyuma y’uko ubwo bwato burohamye mu ijoro ryo ku wa 8 rishyira ku wa 9 Ukwakira 2026.
Amakuru yatanzwe n’abarokotse agaragaza ko ubwo bwato bwarohamiye hafi ya Guhere, mu majyaruguru ya Obock, umujyi wa Djibouti uri ku nkombe z’inyanja.
IOM yavuze ko abantu barenga 80 barokotse iyo mpanuka, bose bakaba ari Abanya Ethiopia.
Reuters yanditse ko mu mibiri 109 yari imaze kuboneka, 52 yari iy’abagabo, 42 iy’abagore, naho 15 isigaye ikaba iy’abana.
Muri abo bana harimo abakobwa icyenda n’abahungu batandatu.
Alexandre Coissac, umuyobozi wa IOM muri Djibouti, yavuze ko abakozi b’iri shami bari gukorana n’inzego z’ibanze kugira ngo batange ubutabazi bwihutirwa.
Ati: “Iyi mpanuka iteye agahinda iributsa mu buryo bukomeye akaga abimukira bahura na ko mu gihe baba bashaka amahirwe yo kwiteza imbere mu bukungu bayasanze ahandi hatari iwabo.”
IOM yatangaje ko inzego za Djibouti zikomeje ibikorwa byo gushakisha no gutabara ababa bakiri mu kaga.
Izo nzego kandi zirimo kwita ku barokotse, zibaha ubuvuzi, ndetse zigategura gushyingura abapfuye.
Guverinoma ya Djibouti ntiragira icyo ivuga kuri iyo mpanuka.
Intambara muri Yemen ikomeje kongera ibibazo by’abimukira
Iyi mpanuka ibaye mu gihe umutekano muri Yemen ukomeje kuzamba, kubera ubwiyongere bw’imirwano hagati y’ingabo za Leta zishyigikiwe na Arabie Saoudite n’inyeshyamba z’Abahouthi zishyigikiwe na Iran.
Iyi ni yo mirwano ikomeye cyane yongeye kubura hagati y’izo mpande kuva mu 2022, ubwo agahenge kashyizweho n’ubuhuza bw’Umuryango w’Abibumbye kagabanyaga cyane ibitero byambukiranya imipaka.
Kongera kwaduka kw’imirwano bishobora guhindura uko uduce dutandukanye twa Yemen tugenzurwa, bikagira n’ingaruka ku mutekano w’ubwikorezi bw’ibicuruzwa mu Nyanja Itukura.
IOM iherutse kugaragaza ko ikibazo cy’abaturage bahunga imirwano muri Yemen gikomeje gutera impungenge.
Imibare yashyizwe ahagaragara n’iri shami mu cyumweru gishize yerekanye ko umubare w’abavuye mu byabo wavuye ku bihumbi 76 hagati muri Nzeri, ukagera ku bihumbi 200.
IOM kandi yatangaje ko kugeza mu cyumweru gishize, abantu barenga 3.700 bari barahunze Yemen banyuze mu nyanja berekeza muri Djibouti.
Imirwano yongeye kubura no muri Ethiopia
Mu gihe abimukira bakomeje guhura n’akaga mu karere, muri Ethiopia na ho imirwano yongeye kwaduka mu kwezi gushize.
Ibi bikomeje guteza impungenge ku mutekano w’akarere no ku bantu bashobora kongera guhunga ibihugu byabo bashaka umutekano n’amahirwe yo kubaho neza ahandi hatari iwabo.
