Menu
Indimi
Advert

Icyorezo COVID-19

Igerageza Rishya Ryerekanye Ko Urukingo Rwa AstraZeneca Rukora Kuri 79%

Yanditswe kuwa

Igerageza ryagutse ku rukingo rwa AstraZeneca ryerekanye ko rushobora kurinda umuntu kugaragaza ibimenyetso bya COVID-19 kuri 79%, rukamurinda kuzahazwa na yo cyangwa kujyanwa mu bitaro 100%.

Kuri uyu wa Mbere nibwo hatangajwe ibyavuye mu igerageza ku bwizerwe bw’urukingo rwa AstraZeneca, ryakozwe n’impuguke zo muri Kaminuza za Columbia na Rochester ku buftanye na AstraZeneca. Ryakorewe ku bantu 32.449 muri Leta Zunze Ubumwe za Amerika, Peru na Chile.

Ugereranyije n’izindi nkingo, urwa Moderna rwagaragaje ko rushobora kurinda umuntu kugaragaza ibimenyetso bya Covid ku kigero kiri hejuru ya 94% mu gihe urwa Pfizer-BioNTech ari 95%.

Izo nkingo zose ariko zirinda umuntu kuzahazwa n’icyo cyorezo 100%.

Mu isesengura ryakozwe kandi, abahanga basanze urwo rukingo ntaho ruhuriye n’ibyago byo kwipfundika kw’amaraso, nyuma y’igenzura ryakozwe ku bantu 21.583 bahawe nibura urukingo rumwe.

Ibyo bipimo byashimangiye icyemezo giheruka gufatwa n’akanama k’u Burayi gashinzwe kugenzura imiti, kemeje ko urukingo rwa AstraZeneca rwizewe kandi rufasha mu kurinda ubukana bwa COVID-19.

Ni nyuma y’uko ibihugu byari bikomeje guhagarika gutanga urukingo rwa AstraZeneca kubera impungenge z’uko rwaba rutera ukwipfundika kw’amaraso, gushobora no gutera urupfu.

Nyuma y’icyemezo cy’impuguke zo mu Burayi, u Budage, u Bufaransa, u Butaliyani na Espagne byahise bisubukura gutanga inkingo za AstraZeneca.

Mu bakoreweho igerageza, 20% bari barengeje imyaka 65 ndetse abagera muri 60% bafite indi ndwara ikomeye nka diyabete cyangwa indwara z’umutima, ibintu ubusanzwe byongera ibyago byo kuzahazwa n’icyorezo cya Covid-19.

Byafashwe nk’ibitanga icyizere mu buryo uwo rukingo rushobora gutanga umusanzu mu kurinda abakuze kuzahazwa na Covid-19.

Kuva urukingo rwa AstraZeneca rwatangira gutangwa, hari ibihugu byinshi nk’u Budage byari bitaremeza ko ruhabwa abantu barengeje imyaka 65, kubera ko hari hataraboneka ibipimo bya gihanga byashingirwaho mu kwizera uko rukora ku bantu bakuze.

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement
Advertisement