Ubuyobozi bwa Basketball Africa League (BAL) bwerekanye impeta ikoze muri zahabu iri buhembwe ikipe iri butware igikombe cy’iri rushanwa.
Byakozwe mu rwego rwo kongerera agaciro iri rushanwa rikomeye ku mugabane wa Afurika muri Basketball.
Kuri iki cyumweru nibwo hari bukinwe umukino wa nyuma wa BAL saa kumi n’ebyiri z’umugoroba muri BK Arena, uhuza Petro de Luanda yo muri Angola na RSSB Tigers yo mu Rwanda.
Abakoze iriya mpeta, bayikoze mu buryo bwihariye bugaragaza umurage, ishema n’umuco wa Afurika.
Umunyabugeni witwa Victor Solomon, uzwi cyane mu gukora impeta z’amarushanwa akomeye nka NBA niwe wayihanze, akaba Umunyamerika wahanze ikirango kizwi na benshi cya Nike.
Impeta nk’iriya kandi imenyerewe muri shampiyona ya basketball muri Amerika, National Basketball Association NBA, igahabwa buri mukinnyi, umutoza, n’abandi bayobozi b’ikipe yegukanye igikombe cya shampiyona.
Yatangiye gutangwa mu mwaka wa 1947, ikaba ikimenyetso gikomeye cyane kuko gisigara mu mateka y’umukinnyi wegukanye igikombe.
Impeta zitangwa muri shampiyona ya NBA (NBA Championship Rings) akenshi ziba zikozwe mu mabuye y’agaciro nka zahabu cyangwa ifeza, kandi ziba zifite ibintu by’ingenzi biziranga, birimo izina ry’ikipe n’ikimenyetso cyayo (logo), umwaka iyo kipe yegukanyemo igikombe, izina ry’umukinnyi ndetse n’ikirango cya NBA.
Agaciro k’impeta imwe y’aho muri Amerika kaba kari hagati ya $50,000 na $150,000.
Abateguye Basketball Africa League bavuga ko iyi ntambwe ikurikiye icyemezo bafashe cyo gutangira guha abakinnyi n’abatoza begukanye igikombe impeta nk’uko bikorwa mu marushanwa akomeye ku isi, mu rwego rwo kubaha icyubahiro cyihariye.
Ni uburyo bwo kugaragaza ko BAL ikomeje kuzamura urwego rw’irushanwa no kurushaho kurishyira ku rwego rw’andi marushanwa akomeye ku isi.
Ubusanzwe, ikipe itwara igikombe cya Basketball Africa League (BAL) ihabwa $100,000, aya akaba amakuru yatangajwe ku mugaragaro mu mwaka wa mbere wa BAL (2021).
Ikipe ya kabiri yo ihabwa $75,000, iya gatatu igahembwa $55,000, naho iya kane $25,000.
Kuva ayo mafaranga yatangazwa, nta wundi mubare uratangazwa ngo usimbure uwavuzwe haruguru.
Muri BAL 2025, ikipe ya Al Ahli Tripoli ni yo yegukanye igikombe itsinze Petro de Luanda ku mukino wa nyuma.
