Amakuru avuga ko kuri uyu wa Mbere ahagana mu masaha ya kare mu gitondo abarwanyi birukanye ingabo za DRC mu gace kitwa Kisharo.
Niko gace gakomeye ka Teritwari ya Rutshuru mu Ntara ya Kivu y’Amajyaruguru.
Ni agace ka gisirikare ka Binza kari kamaze iminsi kagenzurwa n’ingabo za DRC.
Abayobozi bo muri aka gace bavuga ko imbunda ziremereye zatangiye kumvikana mu gitondo kare kare, bituma abaturage bazinga utwabo barahunga.
Radio Okapi yanditse ko abenshi muri bo bahungiye ahitwa Buramba mu bilometero 30 uvuye Kisharo, abandi bagana Nyamilima na Ishasha.
Ku rundi ruhande, abarwanyi b’uyu mutwe bavugwaho gusahura amaduka.
Hari impungenge kandi ko ziriya nyeshyamba zizafata n’umupaka wa Ishasha ukora kuri Uganda.
Andi makuru avuga ko Bunani Taliki 01, Mutarama, 2023 ingabo za DRC zakubise inshuro abarwanyi ba M23 zibirukana mu bice bya Kamatembe no muri Karenga muri Pariki y’Ibirunga mu Ntara ya Masisi.
Abarwanyi ba M23 baherutse kuvuga ko bagiye kuva mu birindiro bya Rumangabo na Kishishe.
