Abajenerali(bagiye mu zabukuru) babiri bahoze bakuriye ubutasi bwa gisirikare muri Uganda( mu bihe binyuranye) Maj Gen Abel Kandiho na Brig Gen Charles Bakahumura, batawe muri yombi mu gitondo cyo ku wa Gatatu, nk’uko The New Vision yabitangajwe.
Chimp Report yo yanditse ko Kandiho yafatiwe mu rugo rwe ruri mu Karere ka Gomba, mu gihe Bakahumura, amakuru arambuye ku hantu yafatiwe n’urwego rw’umutekano rwamufashe atahise amenyekana.
Ifatwa ry’aba bajenerali rikurikiye amagambo aheruka gutangazwa n’Umugaba Mukuru w’Ingabo za Uganda (UPDF), Gen Muhoozi Kainerugaba wavuze ko hari abajenerali basezerewe mu gisirikare bashobora gufungwa.
Icyo gihe Muhoozi yagarutse by’umwihariko kuri Kandiho, avuga ko icyo gihe yari mu rugo rwe i Gomba, bica amarenga y’uko ari ho yari afungiwe.
Uyu mugabo yigeze kuyobora CMI ( Chieftaincy of Military Intelligence), urwego rwa gisirikare rwagize uruhare rukomeye mu gushimuta no gukorera iyicarubozo Abanyarwanda mu myaka ya 2018 no mu yindi mike yakurikiyeho.
Amakuru Taarifa Rwanda ikesha Daily Monitor avuga ko we na Gen Bakahumura bakurikiranyweho gutanga amakuru y’ubutasi atari yo.
Nta makuru arambuye atangwa kuri ayo makuru atari yo, gusa aba bagabo bafunzwe bakurikira undi witwa Gen Birungi nawe wayoboye CMI wasimbuye Kandiho nawe ufunzwe.
Uyu hamwe na bagenzi be bakoraga mu nzego z’ubutasi n’iperereza rya gisirikare bafungiwe mu kigo cya gisirikare cya Makyinde.
Gen Kandiho na Gen Bakahumura bari baherutse gusezererwa mu gisirikare kubera izabukuru.
Muhoozi aherutse kwandika kuri X ati: “Umwe ari mu masambu ye i Gomba. Ashobora kugerageza guhungira mu Rwanda. Tuzamufata aho yaba ari hose.”
Mbere y’ifatwa rya Kandiho, Muhoozi yari yabyutse atangaza ko umwe mu bo yise “abajenerali babyinaga” yamaze gufatwa, avuga ko undi na we azafatwa vuba.
Kandiho yari umuntu ukomeye mu miyoborere yo mu nzego z’ubutasi bwa gisirikare bwa Uganda, aho yabaye Umuyobozi Mukuru w’Ubutasi bwa gisirikare mbere yo gusezererwa .
Bakahumura na we yabaye Umuyobozi Mukuru w’Ubutasi bwa gisirikare kuva mu mwaka wa 2012 kugeza mu 2017.
Nyuma yaho yayoboye ishami rishinzwe ibikoresho n’ubwubatsi mu gisirikare, ndetse ahagararira igisirikare cya Uganda (Attaché Militaire) muri Turikiya.
Jimmy GATETE
TAARIFA.RW
