Polisi y’u Rwanda iherutse gufatira mu Karere ka Musanze umukobwa bivugwa ko yakoraga akazi ko mu rugo bivugwa ko yari yibye shebuja Frw 1, 544,000.
Yari asanzwe ari umukozi wo mu rugo mu Mudugudu wa Kabeza, Akagari ka Kabera, Umurenge wa Cyuve.
Ni mu Mujyi wa Musanze.
Superintendent of Police (SP) Alex Ndayisenga, ushinzwe guhuza ibikorwa bya Polisi n’abaturage mu Ntara y’Amajyaruguru, avuga ko yafashwe nyuma y’uko umukoresha we ahamagaye avuga ko abuze amafaranga aho yari yayabitse.
Hari ku mugoroba wo ku Cyumweru avuye mu kazi.
SP Ndayisenga ati: “Umukoresha w’Ayishakiye usanzwe ukora ubucuruzi mu isanteri ya Gashangiro, yaduhamagaye avuga ko mu gitondo cyo ku wa Mbere, ubwo yari agiye kujya ku kazi yarebye mu gikapu cye, asanga haraburamo amafaranga, abaze ayari asigaye asanga havuyemo angana na 1,675,000 Frw.”
Ngo yahise akeka ko ari umukozi we wo m rugo wayibye.
Uwo mukozi uvugwaho kwiba ni umukobwa w’imyaka 18 y’amavuko.
Ngo basanze ariya mafaranga yari yayahishe mu mwenda wa matela.
Andi Polisi yayasanze mu isakoshi ye.
Yose hamwe yarabazwe basanga angana na Frw 1,544,000.
Polisi isaba abafite amafaranga menshi kujya bayabika kuri Banki aho kuyashyira mu ngo zabo.
Uwafashwe yashyikirijwe Urwego rw’Ubugenzacyaha (RIB) rukorera kuri sitasiyo ya Cyuve kugira ngo hakomeze iperereza kuri iki cyaha cy’ubujura mu gihe amafaranga yafatanywe yasubijwe nyirayo.
Abakozi bo mu rugo si abo guterera iyo…
Nyuma y’uko muri Kamena, 2022 mu Murenge wa Ndera havuzwe urupfu rw’umwana w’imyaka icyenda wishwe n’umukozi wo mu rugo ndetse uyu akaza kubyemerera ubugenzacyaha, ubu mu Karere Ka Gasabo naho haherutse kuvugwa indi nkuru y’umukozi wo mu rugo wibye shebuja Frw1,300,000 akayacikana ariko aza gufatirwa iwabo muri Gakenke.
Mu myaka igera kuri itandatu ishize nabyo hari uwari umukozi wo mu rugo wishe umwana w’umukobwa w’aho yakoreraga amwica amuciye umutwe.
Izi ni ingero nke zerekana ko ari ngombwa kwitondera abakozi bo mu rugo n’ubwo bafite akamaro kanini.
Kubera imiterere y’inshingano zabo, abakora mu rugo bamarana igihe kirekire n’abana ndetse n’ubutunzi hafi ya bwose buba muri urwo rugo.
Iyi ni imwe mu mpamvu zituma kubafata nabi byaba ari ikosa rikomeye kuko baba bashobora guhemukira ba nyiri urugo mu buryo runaka kandi bukomeye.
Ubwo buhemu bugaragazwa n’ingero zatanzwe hejuru.
Icyakora nanone umukozi wo mu rugo ufashwe neza, uhembwa ku gihe kandi agahabwa agaciro aba ingirakamaro kandi akarambana n’abo kwa shebuja.
Ku rundi ruhande ariko, ba nyiri urugo bagomba kujya bibuka kubika amafaranga aho akwiye kubikwa, bakirinda kuyandarika kuko hari abakozi bo mu rugo bayandurukana kandi kubafata bikaruhanya, hakaba n’abadafatwa.
Uwo bitahiriye ariko arafatwa nk’uko biherutse kugendekera uwitwa Ngirabakunzi Jean de Dieu uvugwago kwiba shebuja Frw 1,300,000 aho yakoraga mu Murenge wa Remera mu Karere ka Gasabo.
Uyu musore ngo yarangije kwiba ahita ataha iwabo mu Murenge wa Gashenyi mu Karere ka Gakenke.
Polisi yarabimenyeshejwe itangira kumushaka ifatanyije n’inzego z’ibanze.
Umupolisi ushinzwe guhuza ibikorwa bya Polisi n’abaturage mu Ntara y’Amajyaruguru witwa Superintendent of Police (SP) Alex Ndayisenga avuga uko byagenze:
Yagize ati: “ Ngirabakunzi yari asanzwe akora akazi ko mu rugo mu muryango utuye mu Murenge wa Remera mu Karere ka Gasabo, mu Mujyi wa Kigali. Uwamukoreshaga yahamagaye Polisi avuga ko umukozi we yamwibye amafaranga angana na miliyoni 1 n’ibihumbi 300, ndetse ko uwo mukozi yahise ataha iwabo mu Murenge wa Gashenyi mu Karere ka Gakenke, bityo akaba acyeka ko ariwe wayatwaye.”
Kumushakisha byahise bitangira aza gufatirwa mu Mudugudu wa Ruhore asigaranye Frw 814,000, arafungwa.
Si we wanyine wafashwe…
Mu Karere ka Musanze n’aho haherutse gufatirwa undi muntu witwa Emmanuel Dushimiyimana akurikiranyweho kwiba umucuruzi Frw 1,140,000.
Amafaranga avugwaho kwiba yose hamwe ni Frw 1,626,000 harimo Frw 326,000 bivugwa ko yibye umucuruzi wo mu Murenge wa Muhoza mu Karere ka Musanze.
Polisi yashoboye kugaruza Frw 814,000.
Uyu yafatiwe mu Kagari ka Kigombe, Umurenge wa Muhoza, mu Karere ka Musanze.
Bivugwa ko ariya mafaranga yari yayibye umucuruzi wamutumye kumurangurira ibicuruzwa.
SP Ndayisenga ati: “ Polisi yahawe amakuru n’umucuruzi avuga ko yohereje Dushimiyimana kumurangurira ibicuruzwa, amuha ibihumbi 326, akaba atigeze amuzanira ibyo yamutumye cyangwa ngo amugarurire amafaranga ye.”Polisi yahise itangira kumushakisha, imufatira mu Kagali ka Kigombe, aho yafatiwe agifite amafaranga yose, nawe ahita afungwa.
SP Ndayisenga yihanangirije abantu bose bihesha iby’abandi, kuko ari icyaha gihanwa n’amategeko harimo no gufungwa.
