Abahanzi babiri bari mu bo urubyiruko rukunda ari bo Ariel Wayz na Juno Kizigenza baherutse kugaragarizanya urukundo ku munsi w’amavuko wa Kizigenza.

Muri iki gihe abo bahanzi bongeye kwerekana urukundo buri wese afitiye mugenzi we.

Mu myaka ya 2022 bigeze gutandukana bibabaza abakunzi babo ariko muri iki gihe barishimye.

Ku mbuga nkoranyambaga za Ariel Wayz yanditse yifuriza umuntu we isabukuru nziza.

Yanditse ati: “Isabukuru nziza Chéri Juno Kizigenza”.

Juno nawe yifurije umukobwa we isabukuru nzira y’amavuko, hari taliki 09, Nzeri, 2024.

Ariel Wayz nawe aherutse gutangaza ko urukundo rwe na Juno yarwigiyemo kugira ibintu bimwe ibanga mu buzima bwe.

Ikindi avuga ko yize ni ukumenya igihe ibintu bikwiye gutangazwa, ibyatumye benshi batekereza ko ari yo mpamvu aba bombi iyo babajijwe niba barasubiranye babitera utwatsi.

Ariel Wayz na Juno batangiye gukundana muri Kamena 2021, baza gutangaza ko umubano wabo wahagaze mu mpera zawo.

Nubwo icyo gihe batandukanye umubano wabo bashoboye kuwubyaza umusaruro, kuko bakoranye indirimbo zirimo ‘Away’ n’indi Juno yamukoreye yise ‘Birenze’.