Ikigo cy’Igihugu gishinzwe ubumenyi bw’ikirere (Meteo Rwanda) cyatangaje ko mu kwezi k’Ugushyingo 2026, mu bice bimwe by’u Rwanda hateganyijwe imvura nyinshi ishobora kugera kuri milimetero 350, mu gihe muri rusange iki gihugu gitegereje ukwezi kuzarangwa n’imvura nyinshi kurusha isanzwe igwa muri iki gihe.
Meteo Rwanda ivuga ko imvura iteganyijwe mu gihugu izaba iri hagati ya milimetero 85 na 350, mu gihe ubusanzwe mu Ugushyingo hagwa imvura iri hagati ya milimetero 76 na 278.
Iteganyagihe rigaragaza ko mu minsi 20 ya mbere y’uku kwezi hazagwa imvura irenze isanzwe, mu gihe mu minsi icumi ya nyuma biteganyijwe ko izasubira ku kigero gisanzwe.
Icyakora, ingano y’imvura ntizaba ingana mu turere twose. Intara y’Iburasirazuba, Umujyi wa Kigali n’ibice byinshi by’Intara y’Amajyepfo biteganyijwemo imvura izaba irenzeho gato isanzwe ihagwa mu kwezi k’Ugushyingo.
Ibice bimwe by’uturere twa Nyamagabe, Nyamasheke na Karongi ni byo biteganyijwemo imvura nyinshi kurusha ahandi, iri hagati ya milimetero 250 na 350.
Ni na yo mvura iteganyijwe mu bice bimwe by’uturere twa Rusizi na Nyaruguru.
Mu tundi duce, turimo Akarere ka Musanze n’ibice bimwe bya Gakenke, Burera, Huye, Nyaruguru, Gisagara, Muhanga, Nyanza, Ruhango na Rulindo, hateganyijwe imvura iri hagati ya milimetero 185 na 250.
Imvura iri hagati ya milimetero 135 na 185 iteganyijwe mu bice bimwe by’Intara y’Amajyaruguru n’iy’Amajyepfo, Umujyi wa Kigali, ndetse no mu turere twa Nyagatare, Bugesera na Gatsibo.
Mu bindi bice bisigaye by’igihugu hateganyijwe imvura iri hagati ya milimetero 85 na 135.
Ubushyuhe n’umuyaga
Nubwo hateganyijwe imvura nyinshi, ubushyuhe bwo ku manywa buzaguma ku kigero kiri hejuru mu bice bimwe by’igihugu, aho bushobora kugera kuri dogere Celsius 30, mu gihe ahandi hazaba hakonje.
Ubushyuhe bwo ku manywa buri hagati ya dogere 28 na 30 buteganyijwe mu Bugesera, mu bice bimwe by’Umujyi wa Kigali no mu tundi turere tw’Intara y’Iburasirazuba, turimo Nyagatare, Gatsibo, Kayonza, Rwamagana na Ngoma.
Ku rundi ruhande, mu bice bimwe by’uturere twa Musanze na Nyabihu hateganyijwe ubushyuhe bwo ku manywa buri hagati ya dogere 20 na 22.
Mu masaha y’ijoro na mu gitondo cya kare, ubushyuhe bushobora kugabanuka bukagera kuri dogere 10 na 12 mu bice bimwe by’uturere twa Nyabihu, Musanze, Nyaruguru, Nyamagabe na Rusizi.
Mu gihe mu bice bimwe by’Umujyi wa Kigali no mu turere tw’Uburasirazuba nka Nyagatare, Gatsibo, Kayonza, Kirehe, Rwamagana na Bugesera, hateganyijwe amajoro ashyushye, afite ubushyuhe buri hagati ya dogere 17 na 19.
Ku bijyanye n’umuyaga, uteganyijwe uzaba ufite umuvuduko uri hagati ya metero enye na 12 ku isegonda mu bice bitandukanye by’igihugu, nubwo hari aho uhazaba ufite imbaraga nyinshi kurushaho.
Ibice bimwe by’uturere twa Karongi, Rutsiro, Rubavu, Nyabihu, Ngororero, Kamonyi, Bugesera, Kirehe, Ngoma, Muhanga, Nyamagabe na Ruhango ni byo biteganyijwemo umuyaga ukomeye, ufite umuvuduko uri hagati ya metero umunani na 12 ku isegonda.
Meteo Rwanda yasabye abaturage gukurikiza amabwiriza n’inama bitangwa na Minisiteri ishinzwe ibikorwa by’ubutabazi (MINEMA) n’izindi nzego zibifitiye ububasha, kugira ngo hirindwe ibyangizwa n’imvura nyinshi n’umuyaga ukaze.
Uturere twa Nyamagabe, Nyamasheke, Karongi, Rusizi na Nyaruguru ni two dufite ibice biteganyijwemo imvura nyinshi kurusha ahandi, ishobora kugera kuri milimetero 350.
