Ku wa Gatanu tariki 18, Kamena, 2021 Minisitiri w’Intebe wa Israel Naftali Bennett na Minisitiri w’ubuzima bemeje ko hari inkingo bagomba guha Palestine ngo ikingire abaturage bayo. Bidatinze Palestine yarazanze, ivuga ko kuzemera byaba ari ukugambanira abaturage bayo.
Ubu bugambanyi ngo bwaba bushingiye ku ngingo y’uko ziriya nkingo ziri hafi kurangiza igihe zagenewe bityo kuzemera bikaba byaba ari ugukingiza abaturage bayo inkingo zishaje, zitagifite ubuziranenge zakoranywe.
Minisitiri w’ubuzima muri Palestine witwa Mai Al-Kaila yabwiye itangazamakuru ko ziriya nkingo ‘nta buziranenge buhagije zifite.’
Leta ya Palestine yafashe umwanzuro wo kwanga ziriya nkingo nyuma y’igitutu yashyizwemo n’abaturage bayo, bavugaga ko nta munya Palestine wagombye kwizera inkingo bahawe na Israel.
Itangazo ryo kwanga ko ziriya nkingo zikoreshwa muri Palestine ryasohotse nyuma y’uko hari inkingo 100 000 za Pfizer zari zoherejwe muri kiriya gihugu ziturutse muri Israel.
Ubutegetsi bw’i Yeruzalemu bwari bwatangaje ko bwagiranye amasezerano n’ubw’i Ramallah ( muri Palestine) yo kuzabuha inkingo miliyoni imwe n’ibihumbi magana ane yo gukingira abaturage babwo.
Izi nkingo zagombaga gutangwa hagati ya Nzeri n’Ukwakira, 2021.
Nyuma gato y’uko inkingo za mbere zigejejwe yo, Minisitiri w’Intebe wa Palestine Mohammad Shtayyeh yahise atangaza ko ariya masezerano asheshwe kuko basanze ziriya nkingo zishaje, ziri burangize igihe zagenewe gukoreshwa bidatinze.
The Jerusalem Post yanditse ko Israel yari yabibwiye Palestine na mbere y’uko bashyira umukono kuri ariya masezerano.
Minisiteri y’ubuzima muri Israel yemeza ko nta nkingo zishaje yigeze igenera Palestine, ahubwo ngo ibintu byose birebana n’ubuziranenge bwazo yari yabimenyesheje abategeka Palestine.
Yemeza ko inkingo bahaye abanya Palestine ari zo zatewe n’abanya Israel, ko nta vangura cyangwa agahimano bigeze bashyiramo.
Ikindi cyemezwa n’abashinzwe ubuzima muri Israel ni uko ikigo cya Palestine cyaguze ziriya nkingo kigomba gukurikiza amabwiriza akubiye mu masezerano bagiranye na Israel bagakingira abaturage babo.
Wari umubare wa Israel…
Bamwe mu bashinzwe umutekano wa Israel babwiye Guverinoma nshya ko kuba hari abanya Palestine benshi badakingiwe COVID-19 mu gihe abanya Israel hafi ya bose bakingiwe, ari ikibazo ku buzima n’umutekano w’igihugu.
Bemeza ko ubwandu bw’abanya Palestine bwa kiriya cyorezo bushobora kuzaba ikibazo cy’ubuzima n’umutekano kuko hari bamwe mu banya Palestine bashobora kuzajya banduza COVID-19 abanya Israel kandi bamwe ‘bakabikora nkana.’
Abo bahanga bagiriye inama ubutegetsi bwa Israel kureba uko bwakingira abanya Palestine kiriya cyorezo.
Bidatinze, Minisitiri w’ubuzima wa Israel witwa Nitzan Horowitz yahamagaye mugenzi wo muri Palestine witwa al-Kaila baganira kuri iyo ngingo.
Horowitz yagize ati: “ Burya COVID-19 ntizi imipaka n’ibindi bintu bitandukanya abantu. Gufasha gukingira abanya Palestine biri mu nyungu z’ibihugu byombi.”
Icyerekana ko COVID-19 ari ikibazo cy’umutekano w’igihugu ni uko hari n’umusirikare mukuru mu ngabo za Israel wagize uruhare muri biriya biganiro.
Ni Major General Rassan Alian uyobora ingabo zikorera mu gice cya Israel gituranye na Gaza.
Mu mezi make ashize hari ibinyamakuru na sosiyete sivili banenze Israel ko yimye Palestine inkingo za COVID-19, ariko ku rundi ruhande, abanya Palestine bo bavuga ko nta nkingo za Israel bigeze bayisaba.
Igiteye impungenge muri iki gihe ngo ni uko Israel yibutse kuziha abanya Palestine muri iki gihe bivugwa ko zashaje, zibura igihe gito ngo ntizongere gukoreshwa.
Abanya Palestine bakingiwe na Israel ni abantu 100 000 gusa n’abo kandi ngo ni abafite impapuro zibemerera gukorera muri Israel.
