Noteri mu Murenge wa Remera mu Karere ka Gasabo witwa Elyse Ndamyimana yaguye mu bitaro bya Kacyiru nyuma yo guterwa ibyuma n’abagizi ba nabi.
Amakuru y’ibanze Taarifa ifite avuga ko uyu mugabo yatezwe n’abantu bataramenyekana bamutera icyuma mu musaya no mu ijosi.
Abamutabaye bamugejeje kwa muganga bamuha ubufasha bw’ibanze ariko ubuzima buranga buramucika.
Umunyamabanga Nshingwabikorwa w’Umurenge wa Remera Déo Rugabirwa yabwiye Taarifa ko urwo rugomo rwabaye hagati ya saa tatu na saa yine z’ijoro.
Muri ayo masaha imvura yasaga n’irimo guhita.
Avuga ko abakoze urwo rugomo batarafatwa, ariko iperereza rigamije kubafata ryatangiye.
Ikindi ni uko nyakwigendera yari atashye avuye mu kazi afite ku Gisozi naho mu Karere ka Gasabo.
Rugabirwa avuga ko nta rugomo nk’uru rwabaga mu Murenge wa Remera.
