Dukurikire kuri

Mu Rwanda

Niba Abantu Bashaka ‘Gukomeza’ Kwidagadura Nibakomeze Birinde COVID: CP Kabera

Published

on

Umuvugizi wa Polisi y’u Rwanda Commissioner of Police( CP) John Bosco Kabera yaraye avugiye kuri Televiziyo y’igihugu ko niba Abanyarwanda bashaka gukomeza kwidagadura no kwishimira ko hari ingamba zadohowe, nibakomeze kwirinda COVID-19 kuko ngo iyaje muri iki gihe yandura vuba.

Hari mu kiganiro ‘Ishusho y’Icyumweru’ yagarukaga ku ishusho y’uko umutekano mu Rwanda muri rusange n’ikurikizwa ry’amabwiriza yo kwirinda COVID-19 byari byifshe mu Cyumweru cyarangiye Tariki 05, Ukuboza, 2021.

Abajijwe uko abona Abanyarwanda birinda kiriya cyorezo muri iki gihe, CP Kabera yavuze ko muri rusange bakirinda neza ariko ko batagomba kudohoka ku ngamba ngo bibwire ko kuba hari imirimo myinshi yakomorewe, byahaye abantu uburenganzira bwo kutirinda kiriya cyorezo.

CP Kabera yagize ati: “ Abaturarwanda muri rusange barubahiriza amabwiriza. Ni nayo mpamvu tugeze aho tugeze aha ngaha ariko icyo tubasaba ni ugukomereza aho.  Noneho ariko iyo hajemo indi virusi yihinduranya, ntawe uzi niba ari yo ya nyuma cyangwa hazaza indi, biba bivuze ko bagomba gukaza umukandara, bakamenya ko bagomba kwirinda.”

Polisi y’u Rwanda ivuga ko niba abaturage bashaka gukomeza kwidagadura, guhahirana, ubukwe, gushyingura, ibitaramo, ingendo…ni ngombwa ko bakomeza kwirinda kiriya cyorezo ntigifate benshi.

Umuvugizi wa Polisi y’u Rwanda yavuze ko hari ibintu bitanu Abanyarwanda bagomba kuzirikana.

CP Kabera avuga ko kugira ngo COVID-19 ihitana umuntu ngo ni uko aba yayirwaye.

Kugira ngo yirinde ko imuhitana bizamusaba kwirinda kuyirwara.

Kwirinda kuyirwara nabyo bizasaba Umunyarwanda kwirinda kuyandura.

Umuvugizi wa Polisi avuga ko ibyavuzwe haruguru byose kugira ngo byirindwe bisaba ko umuntu akurikiza ingamba Leta yafashe kugira ngo irinde abaturage kwandura kiriya cyorezo.

Indi ngingo Umuvugizi wa Polisi y’u Rwanda yashimangiye ni ugukingirwa.

Avuga ko urukingo ari ikintu gikomeye mu gufasha abantu kwirinda kuzahazwa n’ubwandu bushya bwadutse bwa COVID-19 bwise Omicron.

Minisitiri w’Intebe Dr Edouard Ngirente nawe aherutse kubwira Abadepite ko igihe kigeze ngo Abanyarwanda batarikingiza bafatirwe ingamba zibakumira, zikababuza kuba bakwanduza abakingiwe.

Twakwibutsa abasomyi ko ubwoko Omicron bwadutse bwa mbere muri Botswana ariko ubwandu bwinshi buboneka muri Afurika y’Epfo.

Abahanga bo muri Afurika y’Epfo nibo babitangaje, babikora bagamije kurinda ko abantu benshi bazandura bakayoborwa ubwoko bw’iyo virusi.

Ishami ry’Umuryango w’Abibumbye rishinzwe ubuzima ku isi riherutse gutangaza ko ubwoko bushya bw’icyorezo COVID-19 biswe Omicron bwamaze kugaragara mu bihugu 38 hirya no hino ku isi, ariko ngo amahirwe ni uko nta muntu burahitana.

Ibi ngo ni inkuru nziza ku batuye Isi muri rusange.

OMS/WHO ivuga ko Omicron imaze kugera mu bihugu 38 hirya no hino ku isi

Umuyobozi muri ririya shami ushinzwe guhangana n’ibyorezo witwa Michael Ryan yagize ati: “ Abantu bihangane ibisubizo by’ibyo bibaza baraza kubibona bidatinze.”

N’ubwo ari uko bimeze ariko, Ishami ry’Umuryango w’Abibumbye rishinzwe ubuzima ku isi rirasaba abatuye isi gukomeza kubahiriza amabwiriza yo kwirinda kiriya cyorezo ari yo kwambara agapfukamunwa, guhana intera, gukaraba intoki kenshi kandi neza no gukingirwa.

Gukingira COVID-19 bihagaze gute mu Rwanda?

Minisitiri w’Intebe Dr Edouard Ngirente

Minisitiri w’Intebe Dr Edouard Ngirente yifashishije imibare aherutse gutangaza ko  Guverinoma y’u Rwanda yari yihaye intego yo gukingira 30% (3.915.533) by’Abanyarwanda bitarenze Ukuboza 2021 na 60% (7.831.066) bitarenze Ukuboza 2022.

Yavuze kandi ko nyuma y’aho Guverinoma yiyemeje gukingira ingimbi n’abangavu bafite imyaka iri hagati ya 12 na 17, imibare y’abagomba gukingirwa COVID-19 mu Rwanda  hose yiyongereye igera kuri 69,4% (9.063.245).

Aba bose ngo bazaba baramaze gukingirwa bitarenze Ukuboza 2022.

Dr Ngirente yavuze ko ku birebana n’intego yo gukingira 9.063.245 by’Abanyarwanda bitarenze Ukuboza 2022, kugeza tariki ya 2 Ukuboza 2021, abari bamaze guhabwa doze ebyiri bari 40% (3.625.636).

Abamaze gufata doze ya mbere bo bangana 6.065.691 bangana na 67%.

Minisitiri w’Intebe kandi yagaragaje ko mu Mujyi wa Kigali, hagendewe ku mibare y’abaturage bahabarurirwa, bafite imyaka 18 kuzamura, yerekana ko 100% bakingiwe bose.

Ikindi ni uko mu Mujyi wa Kigali, uhereye ku bafite imyaka 12 kuzamura, abangana na 869.909, ni ukuvuga 89.2% bamaze guhabwa doze zombi.

Abamaze guhabwa byibura doze ya mbere ni 1.032.499.

Mu zindi Ntara zose hamwe uko ari enye (4), uhereye ku bafite imyaka 12 kuzamura, abangana na 2.755.727, ni ukuvuga 34% bamaze guhabwa doze zombi.

Abamaze guhabwa byibura doze ya mbere bakaba 5.033.192 bangana na 62%.

Minisitiri w’Intebe yanashimiye Abanyarwanda uburyo bakomeje kwitabira gahunda yo gukingirwa Covid-19 ndetse asaba n’abatarabikora ‘kwihutira’ kubikora.

Advertisement
Advertisement