Guhera kuri uyu wa Kane italiki 28, Gicurasi kuzageza italiki 04, Kamena, 2026, Abadepite baratangira ingendo rusange zigamije gusura ibikorwa byo kongera umusaruro w’ubuhinzi.
Umutwe w’Abadepite wateguye ingendo rusange z’Abadepite mu Turere twose tw’lgihugu zigamije kubona amakuru no kugenzura ibikorwa birebana no kongera umusaruro w’ibihingwa ngandurarugo byatoranyijwe hamwe n’ibihingwa ngengabukungu bya kawa n’icyayi.
Izi ngendo ziteganyijwe kuva ku wa 28 Gicurasi kugeza ku wa 4 Kamena 2026 muri imwe mu Mirenge igize Uturere two mu Ntara, no ku wa 6-7 Kamena 2026 mu Mirenge yose mu Mujyi wa Kigali.
Itangazo rigenewe abanyamakuru rivuga ko biriya bizakorwa mu rwego rwo kugenzura ibikorwa bya Guverinoma.
Perezida w’Umutwe w’Abadepite, Kazarwa Gertrude ati: “Dukomeje gushyira imbere inshingano zo kugenzura ibikorwa bya Guverinoma no kwegera abaturage. Izi ngendo zizadufasha kubona amakuru aturutse ku baturage no ku bafatanyabikorwa kugira ngo harebwe uko gahunda zo kongera umusaruro w’ubuhinzi zarushaho gutanga umusaruro no guteza imbere imibereho myiza y’Abanyarwanda.”
Muri izi ngendo, Abadepite bazasura ibikorwa by’ubuhinzi, bagirane n’inzego z’ibanze, amakoperative y’abahinzi, abafatanyabikorwa mu iterambere ndetse n’abaturage.
Hazibandwa ku bibazo n’imbogamizi zikigaragara mu buhinzi zirimo ikoreshwa ry’inyongeramusaruro ku kigero gito, ibibazo by’imihindagurikire y’ikirere, ibura ry’ibikorwaremezo by’ubuhinzi n’ihuzwa ry’abahinzi n’amasoko.
Abadepite bazanifatanya n’abaturage mu muganda rusange wa Gicurasi 2026.
Muri izi ngendo, Abadepite bazakira kandi banashakire ibisubizo ibibazo by’abaturage ari nako bazasuzuma uko ibibazo bagejejejweho mu ngendo ziheruka byakemuwe.
